ಅರು ಹಿರಿಯರೆಲ್ಲರು ಕೋಡಗದ ದಾಡೆಯ
ಸಂಚದ ಕೂಳನುಂಡು,
ತಮ್ಮ ಸಂಚಾರದ ಸಂಚವನರಿಯದೆ,
ಮುಂಚಿದರು ಕಾಲನ ನಾಲಗೆಗೆ.
ಇಂತಿವರು ಸಂಚಿತ ಆಗಾಮಿ ಪ್ರಾರಬ್ಧದಲ್ಲಿ ಲಯಕಾರಣರು.
ಲಯವಿರಹಿತ ನಾರಾಯಣಪ್ರಿಯ ರಾಮನಾಥನಲ್ಲಿ
ಅವಿರಳವಾದ ಶರಣಂಗೆ.

ಅಟ್ಟಕ್ಕೆ ನಿಚ್ಚಣಿಕೆಯನಿಕ್ಕಲಾಗಿ
ನುಂಗಿತ್ತು ಅಟ್ಟವ ನಿಚ್ಚಣಿಕೆ.
ನಿಚ್ಚಣಿಕೆಯ ಮೆಟ್ಟಿದವಳ ಅಟ್ಟ ನುಂಗಿತ್ತು.
ಅಟ್ಟವ ನಿಚ್ಚಣಿಕೆಯ ಮೆಟ್ಟಿದವಳ ಬಟ್ಟಬಯಲು ನುಂಗಿತ್ತು.
ಆ ಬಟ್ಟಬಯಲ ಮೆಟ್ಟಿ ನೋಡಿ ಕಂಡ
ನಾರಾಯಣಪ್ರಿಯ ರಾಮನಾಥ.