ಲಿಂಗದ ಹಂಗಿಗಳಲ್ಲ ನಾನು ಬಸವಾ.
ಜಂಗಮದ ಹಂಗಿಗಳಲ್ಲ ನಾನು ಬಸವಾ.
ಪ್ರಸಾದದ ಹಂಗಿಗಳಲ್ಲ ನಾನು ಬಸವಾ.
ಉಭಯಸುಖದ ಪರಿಣಾಮವಿಡಿದು ನಿಂದವಳಲ್ಲ ನಾನು ಬಸವಾ.
ಏನುವನರಿತವಳಲ್ಲ ನಾನು ಬಸವಾ.
ಎಲ್ಲವ ನನ್ನಲ್ಲಿ ನೆಲೆಗೊಳಿಸಿದ ಬಸವ.
ಪ್ರಸನ್ನಮೂರ್ತಿಯಲಡಗಿದ ಬಸವನ ಇರವ ಕಂಡು ಬದುಕಿದೆನಯ್ಯಾ
ಸಂಗಯ್ಯಾ.

ಲಿಂಗ ಸಂಗದಲ್ಲಿ ಹುಟ್ಟಿ
ಜಂಗಮದ ಸಂಗದಲ್ಲಿ ಬೆಳದು
ಭೇದವಡಗಿ ಬೆಳಗು ನಿರ್ವಯಲಾಗಲು ಆನು ಸುಖಿಯಾದೆನಯ್ಯಾ
ಸಂಗಯ್ಯಾ.

ಲಿಂಗವಿದ್ದರೇನು ?
ಆ ಲಿಂಗಕ್ಕೆ ಶಿವಸೂತ್ರದನುಭಾವ ನೆಲೆಗೊಳ್ಳದನ್ನಕ್ಕ ?
ಆ ಲಿಂಗಕ್ಕೆ ಶಿವಸೂತ್ರ ಸಂಬಂಧದಿಂದ
ಸಂಗಯ್ಯನಲ್ಲಿಯಾನುಪ್ರಸಾದಿಯಾದೆನಯ್ಯ.

ಲಕ್ಷದ ಮೇಲೆ ತೊಂಬತ್ತಾರುಸಾವಿರ ಜಂಗಮಕ್ಕೆ
ಮಾಡುವ ಮಾಟವಳಿಯಿತ್ತು ಬಸವಾ;
ಇಂದಿಗೆ ಊಟವಳಿಯಿತ್ತು ಬಸವಾ.
ಇಂದಿಂಗೆ ಅವರ ಸಂಗವಳಿದು
ನಿರಾಲಂಬಮೂರ್ತಿಯ ಇರವು ಕಾಣಿಸಿತಯ್ಯಾ ಬಸವಾ, ಸಂಗಯ್ಯಾ, ಬಸವನ
ರೂಪು ಎನ್ನಲ್ಲಿ ಅಡಗಲು.