ಎಂಬತ್ತೆಂಟು ಕೋಟಿ ರೋಮದ್ವಾರಂಗಳಲ್ಲಿ ಚರಿಸುವ
ವಾಯುವ ಚರಿಸಲೀಯದೆ ಧರಿಸಿ ಬ್ರಹ್ಮನಾಳದಲ್ಲಿ
ನಿಲಿಸುವುದು ನೋಡಾ
ಅಪ್ರಮಾಣಕೂಡಲಸಂಗಮದೇವಾ.

ಎನ್ನ ದೇಹವೆಂಬ ಪ್ರಾಕಾರದೊಳು
ಮನವೆಂಬ ಶಿವಾಲಯ ನೋಡಾ.
ಮನವೆಂಬ ಶಿವಾಲಯದೊಳು
ಚಿದ್ರೂಪವೆಂಬ ಸಿಂಹಾಸನ ನೋಡಾ.
ಚಿದ್ರೂಪವೆಂಬ ಸಿಂಹಾಸನದ ಮೇಲೆ
ಚಿತ್ಪ್ರಕಾಶವೆಂಬ ಲಿಂಗವ ನೆಲೆಗೊಳಿಸಿ
ನಿಶ್ಚಿಂತವೆಂಬ ಹಸ್ತದಲ್ಲಿ ಮುಟ್ಟಿ ಪೂಜಿಸಲು
ಭವಮಾಲೆ ಹಿಂಗಿ ಭವರಹಿತನಾದೆನು ಕಾಣಾ
ಅಪ್ರಮಾಣಕೂಡಲಸಂಗಮದೇವಾ.

ಎಲ್ಲಾ ನಾಡಿಗಳಂ ಕೆಡೆಮೆಟ್ಟಿ
ಬ್ರಹ್ಮನಾಡಿಯ ಒಳಹೊಕ್ಕು ನೋಡಲು
ಅಲ್ಲಿ ಓಂಕಾರಜ್ಯೋತಿಯುಂಟು ನೋಡಾ.
ಆ ಓಂಕಾರಜ್ಯೋತಿಯಲ್ಲಿ ಮನಮಗ್ನಯೋಗವೇ ಯೋಗ,
ಮಿಕ್ಕಿನ ಯೋಗಂಗಳಲ್ಲಿ ಮನಮಗ್ನವಿಲ್ಲ ನೋಡಾ
ಅಪ್ರಮಾಣಕೂಡಲಸಂಗಮದೇವಾ.