ಓಂಕಾರವೆಂಬ ಬಾವಿಯೊಳಗೆ ಒಂದು ಮರ ಹುಟ್ಟಿತ್ತು ನೋಡಾ.
ಆ ಮರಕ್ಕೆ ಮೂರೇಳು ಸಾವಿರದರುನೂರು ಕೊಂಬೆಗಳಾದವು ನೋಡಾ.
ಏಳುಸಾವಿರದಿನ್ನೂರು ಕೊಂಬೆ ಮುರಿದು ಬಿದ್ದವು ನೋಡಾ.
ಪೃಥ್ವಿ ಜಲದಲ್ಲಿ ಮುದ್ದೆಯಾಯಿತ್ತು ;
ಆ ಹಣ್ಣ ಸವಿಯಬಲ್ಲಾತನು ಮಹಾಶರಣ ನೋಡಾ
ಅಪ್ರಮಾಣಕೂಡಲಸಂಗಮದೇವಾ.

ಓಂಕಾರವೇ ಪೀಠ, ಅಕಾರವೇ ಕಂಠ,
ಉಕಾರವೆ ಮೇಗಣಪೀಠವಾಗಿ,
ಆ ಮೇಗಣಪೀಠದ ಮೇಲಿಹ ಬಟುವೇ ಮಕಾರ,
ಆ ಬಟುವಿನೊಳಗಣ ಗುಣಿಯ ಬಿಂದು,
ಆ ಬಿಂದುವಿನೊಳಗಣ ನಾದವೆ ಲಿಂಗವಾಗಿ ಅರ್ಚಿಸುವುದು
ನಿರಾಧಾರಯೋಗ ನೋಡಾ
ಅಪ್ರಮಾಣಕೂಡಲಸಂಗಮದೇವಾ.

ಓಂಕಾರದ ಪೀಠದ ಮೇಲೆ
ನಿಶ್ಶಬ್ದವೆಂಬ ಲಿಂಗವ ನೆಲೆಗೊಳಿಸಿ,
ನಿರಾಮಯದಲ್ಲಿ ನಿಂದು
ನಿರಾಳನಾಗಿಹುದೇ ನಿರಾಧಾರಪೂಜೆ ನೋಡಾ
ಅಪ್ರಮಾಣಕೂಡಲಸಂಗಮದೇವಾ.