ಈ ತನುವುಳ್ಳವರನಾ ತನುವುಳ್ಳವರು ಹೋಲಬಲ್ಲರೆ ?
ಈ ಮನವುಳ್ಳವರನಾ ಮನವುಳ್ಳವರು ಹೋಲಬಲ್ಲರೆ ?
ಈ ಪ್ರಾಣವುಳ್ಳವರನಾ ಪ್ರಾಣವುಳ್ಳವರು ಹೋಲಬಲ್ಲರೆ ?
ಈ ಭಾವವುಳ್ಳವರನಾ ಭಾವವುಳ್ಳವರು ಹೋಲಬಲ್ಲರೆ ?
ಇದು ಕಾರಣ, ಈ ಸಿಂಹ ಗಜವನಾ ಶುನಕ ಸೂಕರ ಹೋಲಬಲ್ಲವೇನು ?
ಗುರುನಿರಂಜನ ಚನ್ನಬಸವಲಿಂಗಾ ಈ ಶರಣನಾನರನು ಹೋಲಬಲ್ಲನೆ ?

ಈ ಪೃಥ್ವಿಯಲ್ಲಿ ಆರೂ ಕಾಣಬಾರದುದ ಕಂಡು
ಶರಣೆಂದು ಸುಖಿಸಿ ಮೈಮರೆತಿರ್ದೆ ಕಾಣಾ.
ಈ ವನದಲ್ಲಿ ಆರೂ ಅರಿಯಬಾರದುದನರಿದು
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಈ ಧನಂಜದಲ್ಲಿ ಆರೂ ನೋಡಬಾರದುದ ನೋಡಿ
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಈ ವಾತದಲ್ಲಿ ಆರೂ ತಿಳಿಯಬಾರದುದ ತಿಳಿದು
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಈ ನಭದಲ್ಲಿ ಆರೂ ಕಾಣಬಾರದುದ ಕಂಡು
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಈ ಆತ್ಮನಲ್ಲಿ ಆರೂ ಅರಿಯಬಾರದುದನರಿದು
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಈ ಸಕಲದಲ್ಲಿ ಆರೂ ನೋಡಬಾರದುದ ನೋಡಿ
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಈ ನಿಃಕಲದಲ್ಲಿ ಆರೂ ಅರಿಯಬಾರದುದನರಿದು
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಈ ನಿರಾವಯದಲ್ಲಿ ಆರೂ ತಿಳಿಯಬಾರದುದ ತಿಳಿದು
ಶರಣೆಂದು ಸುಖಿಸಿ ಮೈಮರೆದಿರ್ದೆ ಕಾಣಾ.
ಗುರುನಿರಂಜನ ಚನ್ನಬಸವಲಿಂಗಾ.

ಈ ಸಂಸಾರಸುಖವ ಮೆಚ್ಚಿ ಮುಂದೇನರಿಯದೆ ಬಂದುಂಡು
ತೊಳಲಿ ಹೋಗುವರು ; ಇನ್ನೆಂದು ಕಳೆದು ಕಾಂಬುವರಯ್ಯಾ ?
ಪರಿಪರಿಯ ಮಿಥ್ಯ ಕುರುಹಿಂಗೆ ಹರಿಹರಿದು ನೆರೆದು,
ಕಿಚ್ಚಿನೊಳು ಅಚ್ಚುತಗೊಂಡು
ಅರಿಯದಾದರು ನಿರಂಜನ ಚನ್ನಬಸವಲಿಂಗಾ.